سینیٹ کا اجلاس کل سہ پہر چار بجے طلب کر لیا گیا ہے۔ اجلاس کا ایجنڈا جاری کر دیا گیا ہے جس میں قانون سازی، عوامی مسائل اور صدرِ مملکت کے خطاب پر بحث شامل ہوگی۔ اس کے علاوہ متعدد قائمہ کمیٹیوں کی رپورٹس، آرڈیننسز اور توجہ دلاؤ نوٹسز بھی ایجنڈے کا حصہ ہیں۔
سینیٹ کا اجلاس کل 4 بجے چیئرمین یوسف رضا گیلانی کی زیر صدارت ہوگا، جس میں قانون سازی، عوامی مسائل اور صدر مملکت کے خطاب پر بحث کی جائے گی۔ ایجنڈا میں متعدد قائمہ کمیٹیوں کی رپورٹس، آرڈیننسز اور توجہ دلاؤ نوٹسز بھی شامل ہیں۔
ایجنڈے کے مطابق قائمہ کمیٹی برائے داخلہ اور انسداد منشیات کے چیئرمین سینیٹر فیصل سلیم رحمان حوالگی ترمیمی بل 2025 پر کمیٹی کی رپورٹ پیش کریں گے۔ اس کے علاوہ ”پاکستان شہریت ترمیمی بل“ اور ”فوجداری قوانین میں ترامیم سے متعلق بل“ پر بھی رپورٹس ایوان میں پیش کی جائیں گی۔
اسلام آباد میں پانی کی قلت اور ”فیڈرل بورڈ آف انٹرمیڈیٹ اینڈ سیکنڈری ایجوکیشن ترمیمی بل 2025“ پر بھی بات ہوگی جس پر سینیٹر بشریٰ انجم بٹ کمیٹی کی رپورٹ پیش کریں گی۔
وزیرداخلہ و انسداد منشیات کی جانب سے ”کیپیٹل ڈیویلپمنٹ اتھارٹی ترمیمی آرڈیننس 2025“ بھی سینیٹ میں پیش کیے جانے کا امکان ہے۔
سینیٹر عبدالشکور خان بلوچستان میں پولیو کیسز میں اضافے پر توجہ دلائو نوٹس پیش کریں گے جبکہ سینیٹر محسن عزیز فیکٹریوں کی بندش اور اس سے پیدا ہونے والی بے روزگاری پر بھی ایوان کی توجہ مبذول کرائیں گے۔
