امریکی جریدے بلوم برگ کی جانب سے اپنی رپورٹ میں کہا گیا ہے کہ پاکستان کے آرمی چیف عاصم منیر کے دورے کے بعد پاک امریکہ تجارتی تعلقات میں مثبت پیشرفت ہوئی ہے۔
امریکی جریدے بلوم برگ کی رپورٹ کے مطابق گزشتہ ماہ امریکی صدر نے پاکستانی آرمی چیف کا وائٹ ہاؤس میں غیرمعمولی خیرمقدم کیا اس کے بعد پاکستان نے ڈونلڈ ٹرمپ کو نوبیل امن انعام کے لیے نامزد کرنے کی سفارش کی۔
امریکی جریدے میں کہا گیا کہ پاکستان نے اپریل میں ٹرمپ خاندان کی ورلڈ لبرٹی فنانشل کے ساتھ مفاہمتی یادداشت پر دستخط بھی کیے۔
رپورٹ کے مطابق آرمی چیف کے دورے کے بعد تجارتی مذاکرات میں حوصلہ افزا پیشرفت ہوئی ہے، پاکستان اور واشنگٹن کے درمیان تعلقات میں بہتری کے آثار نظر آرہے ہیں۔
ادھر پاکستان کی وزارت خزانہ کے مطابق جمعہ کو واشنگٹن میں امریکہ کے ساتھ ہونے والے تجارتی مذاکرات مثبت اور نتیجہ خیز رہے، جن کا مقصد دونوں ممالک کے درمیان اقتصادی تعاون کو فروغ دینا تھا۔
وزیر خزانہ محمد اورنگزیب نے امریکی سیکریٹری برائے تجارت ہاورڈ لٹنک اور امریکی تجارتی نمائندے، سفیر جیمیسن گریئر سے ملاقات کی۔
وزارت خزانہ کے بیان کے مطابق دونوں فریقین نے تجارتی اور اقتصادی تعلقات کو فروغ دینے میں ہونے والی پیش رفت پر اطمینان کا اظہار کیا، جو کہ پاک-امریکہ دو طرفہ تعلقات کی بنیاد ہے۔
بیان میں کہا گیا کہ اورنگزیب نے اس بات پر زور دیا کہ امریکہ اب بھی پاکستان کا سب سے بڑا تجارتی شراکت دار ہے۔
امریکی جریدے کی رپورٹ کے مطابق پاکستانی وزارت خزانہ نے کہا ہے کہ تجارتی مذاکرات میں حوصلہ افزا پیش رفت ہوئی ہے اور پاکستان چاہتا ہے کہ عائد کیے گئے ٹیرف سے ریلیف حاصل کیا جاسکے، پاکستان جولائی کے اوائل میں معاہدہ مکمل کرنے کی توقع رکھتا تھا تاہم تجارتی مذاکرات کی رفتار توقع سے سست رہی ہے۔
