بالی ووڈ کے بے تاج بادشاہ اپنے 30 سالہ کیریئر میں ایک بار پھر اپنے مداحوں کے سامنے ایک نئی فلم ”کنگ“ کے ذریعے واپس آ رہے ہیں۔ یہ فلم نہ صرف ان کی واپسی کی علامت ہے بلکہ ان کی بیٹی سہانا خان کی پہلی اسکرین نمائش بھی ہوگی۔ تاہم، فلم کی شوٹنگ کے دوران ایک افسوسناک حادثہ پیش آیا ہے جس نے ان کے مداحوں کو تشویش میں مبتلا کردیا ہے۔۔
بھارتی میڈیا رپورٹس کے مطابق، شاہ رخ خان ممبئی کے گولڈن ٹوباکو اسٹوڈیو میں ایک شدید ایکشن سین کی شوٹنگ کر رہے تھے کہ اس دوران انہیں ایک پٹھوں کی چوٹ آئی۔ اگرچہ یہ چوٹ سنگین نہیں ہے، تاہم ذرائع کا کہنا ہے کہ ڈاکٹروں نے شاہ رخ خان کو صحت یابی کے لیے ایک ماہ کا آرام تجویز کیا گیا ہے۔
رپورٹ میں بتایا گیا کہ ان کی چوٹ کی تفصیلات ابھی تک پوشیدہ رکھی گئی ہیں، لیکن یہ ایک پٹھوں کی چوٹ ہے، جو زیادہ سنگین نہیں ہے۔ شاہ رخ خان اور ان کی ٹیم فوری علاج کے لیے امریکہ روانہ ہوگئی ہے۔
”کنگ“ کی شوٹنگ کا اگلا شیڈول اب ستمبر یا اکتوبر میں شروع ہونے کی توقع ہے، کیونکہ شاہ رخ خان کو مکمل صحت یابی تک آرام کرنے کی ہدایت دی گئی ہے۔ اس دوران جولائی اور اگست میں طے شدہ تمام شوٹنگ شیڈولز منسوخ کر دیے گئے ہیں۔
شاہ رخ خان کی ”کنگ“ میں دیپیکا پڈوکون، سہانا خان، ابھیشیک بچن، انیل کپور، ارشد وارثی، اور جیکی شروف جیسے مشہور اداکار بھی شامل ہیں۔ اس فلم کی ہدایتکاری سدھارتھ آنند کر رہے ہیں، جنہوں نے شاہ رخ خان اور دیپیکا پڈوکون کو ”پٹھان“ میں بھی ڈائریکٹ کیا تھا۔
فلم ”کنگ“ ایک انتقامی تھرلر کے طور پر سامنے آ رہی ہے، جس میں شاہ رخ خان ایک قاتل کا کردار ادا کر رہے ہیں، جو ایک المناک واقعے کے بعد سہانا خان کے کردار کے ساتھ انتقام لینے نکلتا ہے۔
شاہ رخ خان کی صحت کے حوالے سے جاری تشویش کے باوجود، ان کے مداحوں کی امید ہے کہ وہ جلد اپنی توانائی کے ساتھ سیٹ پر واپس آئیں گے اور ”کنگ“ کے شوٹنگ شیڈول کو مکمل کریں گے۔
