راولپنڈی اور اسلام آباد میں مون سون کا چوتھا سپیل زور پکڑ گیا۔ وقفے وقفے سے تیز بارش نے گرمی اور حبس کا زور توڑ دیا جبکہ موسم خوشگوار ہوگیا۔ تاہم دوسری جانب طوفانی بارشوں نے نشیبی علاقوں میں خطرے کی گھنٹی بجا دی ہے، نالے بپھر گئے اور متعدد علاقوں میں نظام زندگی درہم برہم ہوگیا۔
راولپنڈی میں نالہ لئی کی سطح بلند ہونے پر الرٹ جاری کردیا گیا ہے۔ کٹاریاں کے مقام پر پانی کی سطح 9 فٹ جبکہ گوالمنڈی میں 6 فٹ تک پہنچ گئی۔ واسا نے بھاری مشینری گوالمنڈی پر تعینات کر دی ہے، جبکہ ریسکیو ٹیمیں کٹاریاں اور گوالمنڈی میں موجود ہیں۔ واسا، ریسکیو 1122 اور راولپنڈی ویسٹ مینجمنٹ کمپنی (RWMC) کے تمام عملے کی چھٹیاں منسوخ کر دی گئی ہیں۔ ندی نالوں میں نہانے پر مکمل پابندی عائد کر دی گئی ہے اور خلاف ورزی پر سخت ایکشن لینے کا فیصلہ کیا گیا ہے۔
ادھر اسلام آباد کے سیدپور ولیج میں برساتی نالے بپھر گئے۔ شدید بارش کے باعث تین گھنٹے میں 163 ملی میٹر پانی برسا جس سے نالے دریا کا منظر پیش کرنے لگے۔ سیدپور کے برساتی نالے میں گاڑیاں بہہ گئیں، ترقیاتی کام کے دوران دیوار گر گئی، گھروں کو نقصان پہنچا اور نشیبی علاقوں میں پانی داخل ہوگیا۔ اطلاعات کے مطابق سیدپور نالے پر رواں ہفتے ہی تعمیراتی کام مکمل کیا گیا تھا لیکن غیر قانونی تجاوزات کی وجہ سے پانی کی نکاسی ممکن نہ رہی، جس سے نشیبی علاقوں میں پانی جمع ہوگیا۔
اسلام آباد انتظامیہ کا کہنا ہے کہ بارش رکنے کے بعد غیر قانونی تعمیرات کو منہدم کیا جائے گا تاکہ آئندہ کسی بھی ہنگامی صورتحال سے بچا جا سکے۔
اسلام آباد اور راولپنڈی میں گزشتہ رات سے جاری موسلا دھار بارش نے معمولات زندگی متاثر کر دیے ہیں جبکہ محکمہ موسمیات نے آئندہ چند گھنٹوں کے دوران مزید بارش کی پیشگوئی کی ہے، جس کے باعث نشیبی علاقوں میں پانی جمع ہونے اور ممکنہ سیلابی صورتحال کا خدشہ ظاہر کیا جا رہا ہے۔
محکمہ موسمیات کے مطابق اسلام آباد کے علاقے سیدپور میں گزشتہ 12 گھنٹوں کے دوران 69 ملی میٹر، بسین میں 39 ملی میٹر، ترامڑی میں 30 ملی میٹر، اور گولڑہ میں 24 ملی میٹر بارش ریکارڈ کی گئی۔ راولپنڈی کے علاقوں چکلالہ میں 71 ملی میٹر اور بوکرہ میں 51 ملی میٹر بارش ہوئی۔
نالہ لئی میں پانی کی سطح خطرناک حد تک بلند ہو گئی ہے۔ کٹاریں کے مقام پر پانی کا بہاؤ 7 فٹ اور گوالمنڈی کے مقام پر 4 فٹ تک پہنچ چکا ہے، جس سے قریبی آبادیاں متاثر ہونے کا خدشہ ہے۔
محکمہ موسمیات کا کہنا ہے کہ آئندہ 1 سے 3 گھنٹوں کے دوران مزید بارش متوقع ہے، جس کے نتیجے میں نشیبی علاقوں میں صورتحال مزید خراب ہو سکتی ہے۔
دوسری جانب، راول ڈیم میں پانی کا لیول 1750.10 ایکڑ فٹ تک پہنچ چکا ہے۔ حکام نے اطلاع دی ہے کہ راول ڈیم کے سپل ویز آج صبح 11 بجے کھول دیے جائیں گے تاکہ پانی کی سطح کو کنٹرول میں رکھا جا سکے۔ اس کے ساتھ ہی کورنگ نالے میں بھی پانی کے بہاؤ میں اضافے کا خدشہ ظاہر کیا جا رہا ہے۔
این ڈی ایم اے نے ممکنہ خطرات کے پیش نظر تمام متعلقہ اداروں کو پیشگی الرٹ جاری کر دیا ہے اور شہریوں کو ہدایت کی ہے کہ وہ غیر ضروری سفر سے گریز کریں اور نشیبی علاقوں میں نقل و حرکت سے احتیاط برتیں۔
محکمہ موسمیات کے مطابق بارشوں کا سلسلہ آئندہ 24 گھنٹوں تک جاری رہنے کا امکان ہے، جس کے باعث شہریوں کو ہدایت کی گئی ہے کہ وہ ندی نالوں اور نشیبی علاقوں سے دور رہیں، جبکہ انتظامیہ کو ہائی الرٹ پر رہنے کی ہدایت جاری کر دی گئی ہے۔
