وزیرِ اعظم شہباز شریف کا کہنا ہے کہ ہمیں آج اپنی صفوں میں اتحاد کی جتنی ضرورت ہے پہلے کبھی نہیں تھی۔
بلوچستان میں امن وامان سے متعلق اجلاس کے دوران گفتگو کرتے ہوئے انہوں نے کہا کہ قلات میں انتہائی المناک واقعہ ہوا، میں نے سی ایم ایچ میں زخمیوں کی عیادت کی، وہ بہت حوصلے میں تھے۔
شہباز شریف کا کہنا ہے کہ دہشت گردی کے خلاف جنگ میں سیکیورٹی فورسز نے جانوں کا نذرانہ پیش کیا، پوری قوم سیکیورٹی فورسز کی ان قربانیوں کو سلام پیش کرتی ہے۔
وزیرِ اعظم نے کہا کہ زخمیوں نے کہا کہ ہمیں اس پر کوئی ملال نہیں اگر جان کا نذرانہ پیش کرنا پڑے، پاک فوج کے افسران اور جوانوں کی قیادت میں قانون نافذ کرنے والے ادارے فرض ادا کر رہے ہیں۔
ان کا کہنا ہے کہ یہ سیاست کا وقت نہیں آج قوم کو چیلنج کا سامنا ہے، اس کا مقابلہ کرنے کا وقت ہے، ہمیں اپنی تمام توانائیاں مجتمع کر کے ان دہشت گردوں کا مقابلہ کرنا ہے۔
ہمارے سپوت ماضی کی غلطیوں کی وجہ سے خون کا نذرانہ پیش کر کے ازالہ کر رہے ہیں، میں اپنے عظیم سپوتوں کے خاندانوں اور ماؤں کو سلام پیش کرتا ہوں۔
