ایشین انڈر 16 والی بال چیمپئن شپ کے سیمی فائنل میں پاکستان نے روایتی حریف بھارت کو عبرت ناک شکست دے کر ایونٹ کے فاٸنل کے لیے کوالیفائی کرلیا۔
تھاٸی لینڈ میں جاری ایشین چیمپئن شپ کے سیمی فاٸنل میں پاکستان نے بھارتی ٹیم کی ایک نہ چلنے دی اور سیمی فاٸنل میں 0-3 شکست دے کر ایشین انڈر 16 والی بال چیمپئین شپ کے فائنل میں جگہ بنالی۔
پاکستان جونیئر ٹیم نے کوئی سیٹ ہارے بغیر فائنل میں جگہ بنائی، پاکستان نے پہلا سیٹ 16-25 سے اپنے نام کیا، دوسرے سیٹ میں پاکستان نے 19-25 سے کامیابی پائی اور تیسرے اور فیصلہ کن سیٹ 12-25 سے جیت کر فتح کو گلے لگایا۔
پاکستان کی جانب سے جنید، فیضان، عرفان اور طلحہ نے عمدہ کھیل پیش کرکے اپنی ٹیم کی فتح میں اہم کردار ادا کیا، پاکستان ایونٹ میں شاندار پرفارمنس کی بدولت پہلے ہی عالمی انڈر27 والی چیمپین شپ 2926 میں شرکت کا حقدار بن چکا ہے۔
پاکستان ایونٹ میں اب تک ناقابل شکست رہا، ٹائٹل کے لیے پاکستان کا مقابلہ ہفتے کو ایران سے ہوگا جس نے دوسرے سیمی فائنل میں جاپان کو مات دی۔
دریں اثنا وزیراعظم شہباز شریف نے ایشیئن انڈر 16 والی بال چیمپئن شپ کے فائنل کے لیے کوالیفائی کرنے پر پاکستانی ٹیم کو مبارکباد دی ہے۔
وزیراعظم نے اظہار مسرت کرتے ہوئے کہا کہ پاکستان اس پورے ٹورنامنٹ میں ناقابل شکست رہا، سیمی فائنل میں بھارت کو شکست دے کر فائنل کے لیے کوالیفائی کرنا انتہائی خوش آئند ہے۔
شہباز شریف نے کہا کہ پوری قوم کو اپنے نوجوانوں پر فخر ہے، ہماری دعا ہے کہ اللہ تعالیٰ فائنل میں پاکستانی ٹیم کو کامیاب کرے۔